స్పీకర్‌పై అనుచిత వ్యాఖ్యల కేసు: బీఆర్ఎస్ ఎమ్మెల్సీలు తాతా మధు, నవీన్ రెడ్డిలకు హైకోర్టు నోటీసులు

హైదరాబాద్,వి90న్యూస్,సెప్టెంబర్ 31: తెలంగాణ శాసనసభ స్పీకర్ గడ్డం ప్రసాద్‌ను అసభ్య పదజాలంతో దూషించారనే ఆరోపణల కేసులో బీఆర్ఎస్ ఎమ్మెల్సీలు తాతా మధు, నవీన్ రెడ్డిలకు తెలంగాణ రాష్ట్ర ఉన్నత న్యాయస్థానంలో ఎదురుదెబ్బ తగిలింది. ఈ వ్యవహారంలో గతంలో నాంపల్లి సీనియర్ సివిల్ కోర్టు ఇచ్చిన అరెస్ట్, రిమాండ్ నిరాకరణ ఉత్తర్వులను సవాలు చేస్తూ పోలీసులు దాఖలు చేసిన పిటిషన్‌పై హైకోర్టు ధర్మాసనం తీవ్రంగా పరిగణించి విచారణ చేపట్టింది. ఈ అంశంపై పూర్తి వివరాలతో కూడిన కౌంటర్ దాఖలు చేయాలని ఇద్దరు ఎమ్మెల్సీలను ఆదేశిస్తూ ఉన్నత న్యాయస్థానం అధికారిక నోటీసులు జారీ చేసింది.విచారణ సందర్భంగా ప్రభుత్వం తరఫున పబ్లిక్ ప్రాసిక్యూటర్ నాగేశ్వరరావు కోర్టు ఎదుట వాదనలు వినిపిస్తూ రాజ్యాంగబద్ధమైన శాసనసభ స్పీకర్ పదవిలో ఉన్న వ్యక్తిని బీఆర్ఎస్ ఎమ్మెల్సీలు అత్యంత అనుచిత పదజాలంతో దూషించారని తెలిపారు. అంతేకాకుండా శాంతిభద్రతల పరిరక్షణలో భాగంగా తమ విధులను నిర్వర్తిస్తున్న పోలీసు అధికారులపై కూడా వీరు దాడులకు పాల్పడ్డారని న్యాయస్థానం దృష్టికి తీసుకెళ్లారు. ఈ తీవ్ర పరిణామాల నేపథ్యంలో ఎమ్మెల్సీలిద్దరి అరెస్టు, రిమాండ్‌ను నిరాకరిస్తూ నాంపల్లి దిగువ కోర్టు జారీ చేసిన ఉత్తర్వులను వెంటనే రద్దు చేయాలని పబ్లిక్ ప్రాసిక్యూటర్ కోరారు. ఇరు వర్గాల వాదనలు, ప్రాథమిక నివేదికలను పరిశీలించిన తెలంగాణ హైకోర్టు, ఎమ్మెల్సీలకు సమాధానం ఇచ్చేందుకు అవకాశం కల్పిస్తూ కౌంటర్ దాఖలు చేయాలని ఆదేశించింది. అనంతరం కేసు తదుపరి విచారణను ధర్మాసనం ఎల్లుండికి వాయిదా వేసింది.