ట్యాంక్ బండ్పై సర్వాయి పాపన్న గౌడ్ విగ్రహ పనుల పరిశీలన: ఆగస్టు మొదటి వారంలోగా పూర్తి చేయాలని మంత్రి పొన్నం ప్రభాకర్ ఆదేశం
హైదరాబాద్,వి90న్యూస్,జూన్ 16: హైదరాబాద్లోని ప్రతిష్టాత్మక ట్యాంక్ బండ్పై ప్రతిష్ఠించనున్న అమరవీరుడు సర్దార్ సర్వాయి పాపన్న గౌడ్ విగ్రహ నిర్మాణ పనులను రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ మంగళవారం క్షేత్రస్థాయిలో పరిశీలించారు. ఈ సందర్భంగా విగ్రహ నిర్మాణ పురోగతి, చుట్టూ నిర్మిస్తున్న కాంపౌండ్ వాల్, విగ్రహం ఉంచే ఎత్తయిన గద్దె (ప్లాట్ఫాం) పనుల శైలిని పరిశీలించిన మంత్రి, నాణ్యతా ప్రమాణాలు పాటిస్తూ పనులను వేగవంతం చేయాలని అధికారులకు పలు కీలక సూచనలు చేశారు.
రాబోయే ఆగస్టు మొదటి వారం లోపు సర్దార్ సర్వాయి పాపన్న గౌడ్ విగ్రహ నిర్మాణ పనులన్నింటినీ పూర్తి చేసి ప్రారంభోత్సవానికి సిద్ధం చేయాలని అధికారులను మంత్రి ఆదేశించారు. విగ్రహ పరిసర ప్రాంతాలు పర్యాటకులను ఆకట్టుకునేలా సుందరమైన ల్యాండ్ స్కేపింగ్, ఆకర్షణీయమైన గార్డెన్ పనులు కూడా సమాంతరంగా చేపట్టాలని అధికారులకు సూచించారు. తెలంగాణ ఆత్మగౌరవ ప్రతీక అయిన పాపన్న గౌడ్ విగ్రహాన్ని అత్యంత వైభవంగా ఆవిష్కరించేందుకు ప్రభుత్వం కట్టుబడి ఉందనే ఉద్దేశంతో పనుల్లో ఎలాంటి అలసత్వం వహించకూడదని మంత్రి పొన్నం ప్రభాకర్ స్పష్టం చేశారు.
About The Author
