హైదరాబాద్,వి90న్యూస్,జూన్ 13: తెలంగాణ ముఖ్యమంత్రి ఎ. రేవంత్ రెడ్డి ప్రత్యేక విమానానికి తృటిలో ప్రమాదం తప్పింది. ఢిల్లీ పర్యటన ముగించుకుని హైదరాబాద్ వస్తున్న క్రమంలో శంషాబాద్లోని రాజీవ్ గాంధీ అంతర్జాతీయ విమానాశ్రయ పరిసరాల్లో వాతావరణం ఒక్కసారిగా అత్యంత ప్రతికూలంగా మారింది. విమానం ల్యాండ్ అయ్యే సమయానికి ఈదురుగాలులతో కూడిన భారీ వర్షం కురియడంతో పాటు రన్వే సరిగ్గా కనిపించకపోవడంతో పైలట్ విమానాన్ని ల్యాండ్ చేయడం సురక్షితం కాదని భావించారు. ఈ పరిస్థితులను గమనించిన శంషాబాద్ ఎయిర్ ట్రాఫిక్ కంట్రోల్ అధికారులు ముఖ్యమంత్రి భద్రతను దృష్టిలో ఉంచుకుని ల్యాండింగ్కు అనుమతించలేదు. విమానం కాసేపు గాల్లోనే చక్కర్లు కొట్టినప్పటికీ వాతావరణం అనుకూలించకపోవడంతో, అధికారుల సూచనల మేరకు పైలట్ విమానాన్ని కర్ణాటక రాజధాని బెంగళూరుకు మళ్లించారు. బెంగళూరులోని కెంపెగౌడ అంతర్జాతీయ విమానాశ్రయంలో ముఖ్యమంత్రి విమానం సురక్షితంగా ల్యాండ్ అయింది. సీఎం రేవంత్ రెడ్డి తో పాటు విమానంలో ఉన్న సిబ్బంది అంతా క్షేమంగా ఉన్నట్లు సమాచారం అందడంతో తెలంగాణ, కర్ణాటక కాంగ్రెస్ శ్రేణులు, అధికారులు ఊపిరి పీల్చుకున్నారు. బెంగళూరులో ల్యాండ్ అయిన ముఖ్యమంత్రికి అక్కడి అధికారులు, నేతలు స్వాగతం పలికారు. హైదరాబాద్లో వాతావరణం సర్దుమణిగిన తర్వాత తిరిగి అదే విమానంలో రావాలా లేక రోడ్డు మార్గంలో ప్రయాణించాలా అనే అంశంపై సీఎం కార్యాలయ అధికారులు సమీక్షిస్తున్నారు. ముఖ్యమంత్రి క్షేమంగా ఉన్నారని తెలియడంతో అభిమానులు, ప్రజలు హర్షం వ్యక్తం చేస్తున్నారు.
