హనుమాన్ జయంతి సందర్భంగా V90 న్యూస్ ప్రత్యేక కథనం
వి90 న్యూస్ డెస్క్, మే 11: త్రేతాయుగంలో అంజనీ పుత్రుడు, కేసరి నందనుడు వాయు దేవుని అంశతో జన్మించిన పవిత్ర దినమే హనుమాన్ జయంతి. ఆంజనేయ స్వామి అపారమైన బలశాలి మాత్రమే కాదు, బుద్ధిమంతులలో అగ్రగణ్యుడు. భక్తికి, నిస్వార్థ సేవకు, అంకితభావానికి నిలువెత్తు నిదర్శనమైన హనుమంతుని జన్మదినోత్సవాన్ని పురస్కరించుకుని ఈ మే 12న తెలుగు రాష్ట్రాలతో పాటు దేశవ్యాప్తంగా ఆధ్యాత్మిక శోభ సంతరించుకుంది. సూర్యుడిని పండులా భావించి మింగేందుకు ప్రయత్నించిన బాల హనుమంతుడి సాహసం నుండి, లంకలో సీతమ్మ జాడ కనిపెట్టి రాముడికి ఊరట కలిగించిన దూత వరకు ఆయన చేసిన ప్రతి కార్యం మానవాళికి స్ఫూర్తిదాయకం.ఈ పర్వదినం సందర్భంగా భక్తుల ఆంజనేయ మాల ధారణ ప్రత్యేక ఆకర్షణగా నిలుస్తోంది. గత కొన్ని రోజులుగా కఠినమైన నియమ నిష్టలతో, కేవలం కాషాయ వస్త్రాలు ధరించి, పాదరక్షలు విడిచి హనుమ దీక్షలో ఉన్న భక్తులు ఈ జయంతి రోజున తమ దీక్షను విరమిస్తున్నారు. సూర్యోదయానికి ముందే పవిత్ర స్నానాలు ఆచరించి, ఆలయాల్లో ‘హనుమాన్ గాయత్రి’ మంత్రోచ్చారణల మధ్య ఇరుముడి సమర్పించి మొక్కులు చెల్లించుకుంటున్నారు. మండల కాలం పాటు ఇంద్రియ నిగ్రహంతో సాగించిన ఈ దీక్ష భక్తులలో క్రమశిక్షణను, ఆత్మవిశ్వాసాన్ని పెంపొందిస్తుంది. వీర హనుమాన్ మాల ధరించిన భక్తజన సందోహంతో ఆలయ ప్రాంగణాలు కాషాయ వర్ణ శోభితంగా కనిపిస్తున్నాయి.హనుమాన్ జయంతి వేడుకల సందర్భంగా తెలుగు రాష్ట్రాల్లోని ప్రముఖ క్షేత్రాలు భక్తజన సంద్రమయ్యాయి. ముఖ్యంగా కొండగట్టు అంజన్న ఆలయం భక్తుల జయజయధ్వానాలతో మారుమోగుతోంది. దీక్షా పరులు భారీ సంఖ్యలో తరలివచ్చి ఇక్కడ మొక్కులు చెల్లిస్తున్నారు. అదేవిధంగా, కరీంనగర్ జిల్లాలోని ధర్మపురి, ఖమ్మం జిల్లాలోని ప్రఖ్యాత జీళ్ల చెరువు క్షేత్రం, హైదరాబాద్‌లోని చిక్కడపల్లి వీరాంజనేయ స్వామి ఆలయం, తాడ్బండ్ ఆంజనేయ స్వామి దేవాలయం భక్తులతో కిక్కిరిసిపోయాయి. ఏపీలోని కసపురం నెట్టికంటి ఆంజనేయ స్వామి, విజయవాడ మాచవరం దాసాంజనేయ స్వామి ఆలయాల్లో తెల్లవారుజాము నుండే ప్రత్యేక పూజలు ప్రారంభమయ్యాయి. ఈ ప్రధాన ఆలయాల్లో భక్తులకు ఎటువంటి ఇబ్బందులు కలగకుండా కమిటీలు భారీ ఏర్పాట్లు చేశాయి.నేటి వేడుకల కోసం ఊరు వాడ ఏకమై హనుమాన్ ఆలయాలను విద్యుత్ దీపాలు, పుష్ప మాలలతో సుందరంగా అలంకరించారు. తెల్లవారుజాము నుండే భక్తులు ఆలయాలకు పోటెత్తి సుప్రభాత సేవలు, అభిషేకాల్లో పాల్గొంటున్నారు. హనుమంతునికి అత్యంత ప్రీతికరమైన తమలపాకుల పూజలు, సింధూర లేపనాలతో గాలిగోపురాలు మారుమోగుతున్నాయి. ‘శ్రీరామ జయరామ జయజయ రామ’ అనే తారక మంత్రంతో పాటు ‘హనుమాన్ చాలీసా’ పారాయణాలతో పరిసరాలన్నీ పునీతమవుతున్నాయి. ముఖ్యంగా యువతలో హనుమంతుడు ఒక సూపర్ హీరోగా, ధైర్యానికి ప్రతీకగా నిలుస్తుండటంతో ఈ వేడుకల్లో వారి ఉత్సాహం రెట్టింపు కనిపిస్తోంది.ఆధ్యాత్మికంగా చూస్తే హనుమాన్ జయంతి కేవలం ఒక ఉత్సవం మాత్రమే కాదు, అది అంతర్గత శక్తిని మేల్కొలిపే సందర్భం. మనసులో ఉండే అశాంతిని, భయాన్ని తొలగించి కార్యసిద్ధిని కలిగించే వజ్రకాయుడిని స్మరించుకోవడం వల్ల సానుకూల దృక్పథం పెరుగుతుందని భక్తుల విశ్వాసం. శని దోష నివారణ కోసం, ఆరోగ్యం కోసం భక్తులు పెద్ద ఎత్తున ఆలయాలకు చేరుకుని ప్రసాద వితరణలు చేస్తున్నారు. ఎక్కడ రామనామం వినిపిస్తుందో అక్కడ హనుమంతుడు పులకించిపోయి అంజలి ఘటించి ఉంటాడని పురాణాలు చెబుతున్నాయి. ఈ పవిత్ర దినాన భక్తి మార్గంలో నడుస్తూ రామదాసుని కృపకు పాత్రులు కావాలని ఆధ్యాత్మిక వేత్తలు ప్రబోధిస్తున్నారు.
