హైదరాబాద్ మే 02 ; తెలంగాణలోని మద్యం ప్రియులకు రాష్ట్ర ప్రభుత్వం చేదువార్త చెప్పేందుకు సిద్ధమైంది. రాష్ట్రవ్యాప్తంగా లిక్కర్ ధరలను పెంచేందుకు ప్రభుత్వం కసరత్తు చేస్తోంది. ఈ నెలలోనే పెరిగిన ధరలు అమల్లోకి వచ్చే అవకాశాలు స్పష్టంగా కనిపిస్తున్నాయి.
తాజా సమాచారం ప్రకారం, కేటగిరీల వారీగా పెరగనున్న మద్యం ధరల అంచనా వివరాలు ఇలా ఉన్నాయి:
- సాధారణ బ్రాండ్స్: ఫుల్ బాటిల్‌పై రూ. 60 పెంపు
- ప్రీమియం బ్రాండ్స్: ఫుల్ బాటిల్‌పై రూ. 100 పెంపు
- ఆ పై కేటగిరి బ్రాండ్స్: ఫుల్ బాటిల్‌పై ఏకంగా రూ. 120 వరకు ధర పెంచే యోచన
రాష్ట్ర ఖజానాకు అదనపు ఆదాయాన్ని సమకూర్చుకునే దిశగా ప్రభుత్వం ఈ కీలక నిర్ణయం తీసుకోనున్నట్లు సమాచారం. ఈ తాజా ధరల పెంపు ద్వారా ప్రభుత్వానికి ప్రతి నెలా సుమారు రూ. 250 కోట్ల అదనపు ఆదాయం వచ్చేలా అధికారులు ప్రణాళికలు సిద్ధం చేసినట్లు తెలుస్తోంది. దీనిపై త్వరలోనే అధికారిక ప్రకటన వెలువడే అవకాశం ఉంది.
