హైదరాబాద్/వి90న్యూస్/నవంబర్ 14: తెలుగు చలనచిత్ర పరిశ్రమలో తనకంటూ ప్రత్యేక గుర్తింపు తెచ్చుకున్న ప్రముఖ సీనియర్ నటుడు, నిర్మాత, దర్శకుడు గిరిబాబు (80) కన్నుమూశారు. గత కొంతకాలంగా అనారోగ్య సమస్యలతో బాధపడుతున్న ఆయన, చికిత్స నిమిత్తం ఓ ప్రైవేట్ ఆసుపత్రిలో చేరారు. అక్కడ చికిత్స పొందుతూ పరిస్థితి విషమించడంతో తుదిశ్వాస విడిచారు. ఆయన మరణవార్త తెలియగానే తెలుగు చిత్ర పరిశ్రమ ఒక్కసారిగా దిగ్భ్రాంతికి గురైంది.1946 జూన్ 8వ తేదీన ప్రకాశం జిల్లా రావినూతల గ్రామంలో జన్మించిన గిరిబాబు పూర్తి పేరు యర్రా శేషగిరిరావు. సినిమాలపై ఉన్న మక్కువతో చిత్ర పరిశ్రమలోకి అడుగుపెట్టిన ఆయన, 1973లో విడుదలైన ‘జగమే మాయ’ చిత్రంతో ప్రతినాయకుడిగా వెండితెరకు పరిచయమయ్యారు. తొలి చిత్రంతోనే తనదైన నటన, సంభాషణా శైలితో ప్రేక్షకులను ఆకట్టుకున్నారు. ఆ తర్వాత వెనుదిరిగి చూడకుండా విలన్గా, క్యారెక్టర్ ఆర్టిస్టుగా, హాస్యనటుడిగా ఇలా ఎన్నో వైవిధ్యభరితమైన పాత్రల్లో ఒదిగిపోయి ప్రేక్షకుల హృదయాల్లో చెరగని ముద్ర వేశారు. తన సుదీర్ఘ సినీ ప్రస్థానంలో దాదాపు 600కు పైగా చిత్రాల్లో నటించి మెప్పించిన ఘనత ఆయన సొంతం. కేవలం నటుడిగానే కాకుండా నిర్మాతగా, దర్శకుడిగా కూడా తన ప్రతిభను చాటుకున్నారు. తన కుమారుడు రఘుబాబును కూడా పరిశ్రమకు పరిచయం చేసి, విభిన్న చిత్రాలను నిర్మించి తెలుగు సినిమాకు విశేష సేవలందించారు. ఆయన మరణం తెలుగు చిత్ర పరిశ్రమకు పూడ్చలేని తీరని లోటని, ఒక మంచి నటుడిని కోల్పోయామని పలువురు సినీ, రాజకీయ ప్రముఖులు తీవ్ర సంతాపం వ్యక్తం చేస్తూ ఆయన కుటుంబ సభ్యులకు ప్రగాఢ సానుభూతిని తెలుపుతున్నారు.

